بسم الله والحمدلله
موضوع اليوم كثير بنات
وشباب عانوا منه
اليوم بقولكم تجربتي
ومعاناتي مع حبوب الشباب
والمنتجات اللي أستخدمتها
تقريبا لي ثلاث سنوات وأنا
أعاني من هالمشكلة وسنة عن سنة الحمدلله المشكلة تخف
بحثت كثير ومافي منتج
برفوف الصيدليات والسوبر ماركت ماجربته من غير المنتجات اللي أهلي وصديقاتي يعطوني
أجربها ..
أي مشكلة بالحياة عشان
نلقى لها حل لازم نكتشف جذورها :
*حبوب الشباب تطلع أكثر شي
بالبشرات الدهنية
وتتجمع الدهون والأوساخ والبكتيريا
بالمنطقة وتطلع الحبه ..
يعني لازم أهتم بنظافة
البشرة
مو شرط يعني تكون البشرة
مو نظيفة بس الدهن والبكتيريا والأوساخ وعوامل الجو هي اللي تطلع الحبوب
فاحرصي دائم على نظافة
البشرة وغسيلها بالنهار وبالليل وإذا كنتي تداومين بعد الدوام أغسلي وجهك بغسول
*صراحة
إلى الان ماأدري ليه مارحت الدكتور وخذيت العلاج وخلاص
تنتهي المشكلة .. واختصرت علاج ثلاث سنوات في سنة .. لكن الحمدلله طولت بالي
والمشكلة خفت
أهم شيء
طوله البال
*ومافي منتج بيخفي لك الحبوب بسرعة ولا بيومين!!
في منتجات انبسطت عليها
أول ماجربتها الحبوب خفت وراحت من أول أسبوع لكن بمجرد ماتركتها رجعت لي الحبوب
دبل وبشكل مخيف
مرحلة علاج بشرتي مع
المنتجات :
أبرز المنتجات اللي
أستخدمتها و"خفت الحبوب"
· المنتج التايلندي (YC)+ الزيت الزيتون
هذا الغسول ينشف ينشف البشرة بشكل مو طبيعي وريحته
جميله حلوه في منه بالحليب وبالليمون واتوقع بالخيار إذا ماكنت غلطانه
كنت أبي شي ينشف الدهن اللي بوجهي فاستخدمت اللي
بالليمون وفعلا ينشف .. وطبعا مو تغسلين وجهك بالغسول وخلاص لان برضو الجفاف يطلع
الحبوب
لازم ترطيب البشرة واحترت ..مابي أستخدم أي مرطب ويسبب
لي مشكلة عكسية !!
كان قدامي زيت الزيتون واستخدمته
· توحيد لون..كنت أستخدمه قبل النوم وأقوم ويكون
· تفاعله مع الغسول جدا جيد
· وترطيب ونضارة ..
بعد سنة رجعت المشكلة
وأستخدمت مجموعة الشاي الأخضر من بودي شوب طبية
اللي هي :
*الغسول ( الرغوة) + المرطب
*المحلول يوضع على الحبه نفسها وأثار الحبوب
* ومقشر
أستخدمت المجموعة كاملة
صباح ومساء
إلا المقشر مرة كل أسبوع
خفت وأختفت الحبوب تماما لكن طلعت لي مشكلة التصبغات وأثار حب الشباب
وهذي المشكلة تعالج مع
الدكتور أو بالتقشير
الان أفكر أزور الدكتور
وأتخلص من هذي المشكلات التصبغات وغيرها كليا لان ممكن تطلع الحبوب ثاني وثالث مره
إذا أهملت بشرتي أو أستخدمت أي شي مايناسها
في جوانب ساعدتني في
التخلص من حب الشباب
والأحظ المشكلة تخف أسرع
والنتائج تبان إذا سويت هذي الاشياء
١ـ أتجنب المقليات بجميع
أنواعها سوا مطبوخة أو(التشيبس)
٢ـ أتجنب أو أخفف
الشوكولاتة
٣ـ أتجنب الاكل اللي فيه
نسبة الصوديوم عالية مثل الإندومي والأملاح بجميع أنواعها
٤ـ المشي والرياضة الخفيفة
لمده ٣٠ دقيقة أربع ـ خمس مرات بالأسبوع
٥ـ وأكيد شرب الماء
*تنوية بسيط :
كل اللي ذكرته فوق هذي
تجربة شخصية بالكامل
ومجهود شخصي مني وخفت
المشكلة
يعني إذا ناسبتني هذي
المنتجات يمكن ماتناسبك فالأفضل الإستشارة الطبية وعرض المنتجات على طبيبك
نصيحة : مشكلة حب الشباب
تحتاج تدخل الدكتور وإشراف مستمرعشان مايطول معك الموضوع وتكبر المشكلة وأهم شي
مثل ماذكرت طوله البال وصبر وان شاءالله بشرتك بترجع أحسن وأفضل
هذا بالنسبة لموضوعي اليوم
أتمنى أستفدتوا واللي جربت
وحده من هذي المنتجات
ياريت تشاركنا بتعليقات
هنا أو بالإنستقرام
هذا وصل الله وبارك
0 comments:
Post a Comment