صبغات لاكمي ..أصبغي في البيت وأرتاحي || تجربتي + الأسعار

  

بسم الله والحمدلله 

أنا صارلي أكثر من أربع سنوات وأنا اصبغ في الصالونات 

والحمدلله كانت تجاربي مع الصالونات جيدة ولابأس بها

لكن قررت أصبغ في البيت من الأن 

وأجرب هذي التجربة ..بحكم ان عندي خبرة بسيطة في عالم الصبغات 

وصبغات لاكمي 

سبق وجربتها وأرتحت لها ..أبدا ماخرب شعري معها ولاتغير الحمدلله 

والان رجعت أصبغ من لاكمي وإن شاء الله بإستمر عليها 

وبما أني أرتحت عليها وأعجبتني قلت أنقل لكم تجربتي 

  

طبعا تجي على شكل عصار + علبة الأكسجين 

العصار على حسب طول شعرك .. 

أنا شعري قصير عند رقبتي تقريبا طوله ..فأحتجت عصارين 

 والدرجة اللي أستخدمتها 10\17 

درجة جدا جميلة .. وشعري من قبل أشقر فاتح ولما صبغتها طلع اللون رمادي غامق جميل 

  مكتوب أشقر بلاتيني رمادي .. كنت خايفة شعري يطلع فاتح جدا نفس العينة اللي بالصورة اللي فوق 

لان شعري أساسا فاتح 

لكن تفاجأت طلع العكس جدا جميل رمادي غامق 

حلو !! 

هذا الأكسجين ريحتة أبدا مو قوية مثل الصبغات الثانية تعمي العين 

بس البداية الريحة قوية بعدين خلاص وحتى بعد الغسيل الريحة تروح 

 يعطي نعومة ولمعة حلوة بالشعر 

طبعا العصار والأكسجين تخلطينه مع بعض 

وتبدأين تصبغين 

تتركين الصبغة ٤٠ دقيقة وتغسلينة 

وفيه طريقة ثانية مكتوبة مع الكرتون أترك الصبغة حوالي ٢٠ دقيقة على الأطراف بعدين أرجع اصبغ الشعر كامل من الجذور واتركه ٣٠ دقيقة تقريبا 

لكن أنا كنت مستعجلة وصبغت كامل شعري تركت الصبغة ٤٠ دقيقة وغسلته 

الشي الجميل صبغات لاكمي درجاتها كثيرة وألوانها مختلفة 

أهم شي تعرفون رقم الدرجة اللي تبونها 

وهذي أرقام الدرجات وأنواعها 

أضغطوا هنا عشان تشوفون الدرجات بشكل أوضح 

حتى يبان اللون استخدمي مفتح اللون من نفس لاكمي 

سبق وجربته يكون على شكل عصار تخلطينه مع الأكسجين يخلي الشعر جدا فاتح وموحد

وتصبغين فيه كامل الشعر وتنتظرين ساعة إلى نص ساعة 

بعدين تصبغين الصبغة والدرجة اللي تبينها عادي 

وراح يطلع معك اللون اللي تبينه بإذن الله  

* تنبية ( راح تظهر لك نتائج مرضية إذا كان شعرك مصبوغ بهاي لايت او مسحوب اللون أي فاتح )

نجي عند السعر + مكان الشراء 

اللي يميز صبغات لاكمي ان سعرها جدا جدا رخيص 

بس مشكلتها كل شي سعره لحال 

سعر العصار ١٧ ريال والاكسجين مااتذكر لكن في العشرين أتوقع 

أهم شي بنات ..أنتبهوا من تاجرات الإنستقرام يستغلونكم 

انا ماتحمست وكتبت الموضوع إلى من الأسعار اللي أشوفها بالانستقرام 

تبيع العصار الواحد ب ٥٧ واللي تبيعه ب ٣٧ 

فإنتبهوا 

مكان الشراء : 

في كل محلات التجميل وتجهيز المشاغل مثل مي وغيرها تلقونها هناك وأسعارها رخصية 

لكن أنتبهوا من التقليد أفتحوا موقعهم وشوفوا أشكالها وأنواعها 
وحالياً تباع في صيدلية وايتس

أتمنى من كل قلبي أنكم أستفدتوا بإذن الله 

وبنات اللي سبق وجربتها 

ياريت تذكر تجربتها هنا بالتعليقات أو بإلانستقرام  @goldenladyblog

 هذا وصل الله وبارك 

33 comments مراجعات