بسم الله والحمدلله
أهلاً وسهلاً
موضوع اليوم هو تحديث لموضوع سابق كتبته عن صبغة لاكمي
وهذا الموضوع لكل وحده أول مره تصبغ من لاكمي
ما أخفيكم من ٢٠١٥ وقت لما كتبت عن لاكمي
إلى الآن ٢٠٢٠
كثير توصلني أسئلة بالإنستقرام عن هذه الصبغة
صبغت شعري كثير
بالبيت من صبغة لاكمي وغيرها من ماركات
بني غامق وبني فاتح وأحمر وأشقر
وإذا حسيت أن اللون ماأعجبني اروح ( لصالون أعدله )
القصة وين !
تعب شعري كثير من الصبغات
وحاولت أصلح الأوضاع
وقررت أصبغه بني غامق والنتيجة تكون أسود
وقررت خلاص ماراح اصبغ من جديد
بخلي شعري يرجع للونه الطبيعي ….
شعري فعلاً بدأ يتحسن من جديد ورجعت حيويته الحمدلله
لكن أنا حنيت للصبغات
ورجعت شريت من لاكمي
نفس الدرجات اللي ذكرتها بموضوعي القديم هنا
هذا الكلام في نهايه سنه ٢٠١٩
ركزو معي !
كنت ساحبة لون هاي لايت وكانت نازلة الصبغة
وصبغت فوقها لاكمي لهذا السبب كانت النتائج مرضية
في موضوعي القديم
المشكلة الحالية وين ؟
صبغت وشعري أسود نفس الدرجة السابقة !!
طلعت النتيجة بني برتقالي أوريكم النتيجة كيف
مثل هذي تقريباً
سابقاً لما طلعت النتائج مرضية بسبب أني كنت ساحبة لون
الان لما طلع مائل للاورانج بسبب اني صبغت على شعر أسود
لاكمي :
نتائجها تظهر أفضل إذا كان شعرك مصبوغ ( هاي لايت أو مسحوب اللون )
في طرق كثيره لسحب اللون من لاكمي
لكن ابداً ماانصح فيها
إلا لو كنتي خبيرة بالموضوع
ولا شعرك راح يتدمر !!
لكن انا أمشي وأجرب ماعندي مشكلة
واذا صارت مشكله أطول باللي
الشيء الوحيد اللي مستحيل اجربه سحب اللون بنفسي
فاللي تخاف وماعندها الجرأة لاتحاول وتجرب لاكمي
لان نتائجها مو مثل ماتتوقعين
اللحين بعد ٦ سنوات من كتابتي للموضوع القديم
ومن التجارب أقول كذا
وهذا طبيعي جداً
تعلمت من تجاربي كثير ومازلت ..
لاكمي بعد ماصبغت آخر مره
اللون الاورانج مهما صبغت فوقه
يطلع بشكل خفيف اورنج
وهذا بسبب اني صبغت على شعر غامق ومن غير سحب
حالياً
صرت أستخدم صبغات لوريال درجات غامقة
صبغات لوريال :
أول شيء خفيفة على الشعر
مالها ريحة مزعجة
عيبها انها ماتطول على الشعر ماادري اعتبرها من العيوب أو المزايا
المهم ماتضايق الشعر وتتعبه
وأكيد نوعية شعرك تلعب دور أساسي
دوري عن اللي مناسب لك واللي شعرك يرتاح عليه
أنا أكتشفتها بعد تجارب
ولثقتي في أي منتج للوريال
الصبغة الأولى Loreal prodigy
هذي الصبغة أكثر شيء ناسبني وكل مره احاول اجرب درجة
خفيفة على الشعر مافيها ريحة مزعجة
تطول على الشعر تقريباً شهر
إذا مااستخدمتي زيوت بكثرة
وأغلب الدرجات المناسبة لي تكون بين هذي الأرقام (4.0) - (5.0)
نتيجة غامقة تميل للأسود وخفيف بني
تعجبني وقت المناسبات المفاجأة أستخدمها
تعطي لمعه حلوه للشعر
+
الصبغة الثانية Loreal excellence
الصبغة الثالثة Loreal casting creme gloss
جربتها مره ولا أرجع أشتريها
من لوريال هذي مانسبتني
ثقيلة مره على الخصلة وكل ماغسلت شعري أحسه قاسي
أخيراً..
التجربة التجربة هي الحل
أكتشفي الأنسب والأريح لك
سوا بالصالون ولا بالبيت
كيف ؟ أبدأي أختبري الصبغة على شعرك
ولاتخافين ولاتتوترين كل شيء له حل
صحيح بين فتره وفتره يطلع خفيف الاورانج
بسبب اني صبغت على شعر غامق
وخصوصاً لما أطلع بالشمس يعطي إنعكاس خفيف
لكن متأكدة بيروح مع الوقت بطوله البال
وبين فترة وفترة
أصبغ غامق حتى يرجع لون شعري الطبيعي
هذا كان الموضوع اللي من زمان ابي اكتبه
وأوضح للكثير من الأسئلة
أتمنى أني أفدتكم
وأكيد أي صبغة أو تجربة جديدة
بشاركها معكم
وأي إستفسار يسعدني أجاوبكم
على حسابي بالإنستقرام goldenladyblog@
وصل الله وبارك
