بسم الله والحمدلله
こんにちは
مرحبا بالياباني =)
محل موجي الياباني من المحلات اللطيفة اللي لازم أوقف عندها وأشوف أشيائهم
البسيطة اللي من دون تكلفة لكن جميلة
وهذا سياسة المحل أن منتجاتهم تكون صديقة للبيئة
وبدون تكلفة لكن تفي بالغرض وجودتها عالية وبسعر مقبول
موجي محل قديم تأسس من عام ١٩٨٠م
وعندهم أكثر من ٧٠٠ فرع حول العالم
شريت من فرعهم بالرياض بحياة مول
فواحة عطرية
شكلها يحمس ولطيف
التعليب والتغليف والكيسة
يعكس بساطة التقديم
وفتحنا العلبة الجميلة
تشتغل على خط ٢٢٠ وفيها نوعين من الأفياش
ثلاث فتحات أو فتحتين
مكيال قياس الماء
أقل شي ٢٠مل وأكثر شيء ١٠٠مل
ممكن إذا عبيتوا أكثر من ١٠٠مل تخرب
وهنا الفواحة
على اليمين في
ـ النقطتين عشان تتأكدون ان الغطاء مسكر بإلتقاء النقطتين
ـ والوقت أكثر شيء ١٨٠ دقيقة (ثلاث ساعات)
وأقل شيء ٣٠ دقيقة ( نصف ساعة)
ـ الإضاءه درجتين خفيفة وقوية
هذا الزيت العطري
بريحة نبته "البرغموت" هي فاكهة حمضية
ومعروف البرغموت في بعض تركيبات العطور
مثل ( عطر شانيل مادموزيل البرغموت من ضمن تركية العطر )
صراحة هذا أحلى وأخف ريحة عندهم بالنسبة لي
ريحة سبا على مساج شيء جداً رايق
الباقية بالمحل حسيت قوية جداً (و تصدع برأس )
نجي عند طريقة الإستخدام
نحط بالمكيال القدر اللي نبيه من الماء
ونحط ثلاث نقط من الزيت
ونسكر الغطاء ونحدد الوقت ونشغل النور ونستمتع بالهدوء والريحة
.
تقدرون تستخدمون الفواحة من غير زيت
كترطيب للجو جداً مفيد وضروري موضوع ترطيب جو الغرفة
الناس اللي عندهم حساسية من الغبار (مثل حالتي)
هذي الأجهزة تساعد في الحماية ولو بشكل بسيط
والفواحة في منها حجمين اللي شريتها صغيرة للأماكن الصغيرة مثل مكتب أو غرفة
وفيه الأكبر منها للأماكن الوسيعة
.
أهم شيء ماتشغلون الفواحة وتتركونها
لان ممكن يخلص الماء وتبدأ تصير حارة
لاحظت إذا حطيت المؤقت على ١٨٠ دقيقة تكون حارة بشكل خفيف
فعشان كذا لاتتركونها شغالة إلا وأنتم موجودين للسلامة
فانتبهوا من هذي النقطة
هنا رابط الموقع لوحبيتوا تشوفون منتجاتهم
أكتبوا لي بتعليقات هنا أو بالإنستقرام @goldenlady995 إذا أعجبكتم ولالا
وإذا تعرفون أشكال ثانية أحلى وين أقدر ألقاها
وأيش نوع الزيوت العطرية اللي تحبونها و وين تلقونها ؟
وصل الله وبارك
0 comments:
Post a Comment